No
CEIP Agro do Muíño démoslle vida a un novo espazo lector. Para iso, dentro do
noso PDI “ Pasiño a pasiño facemos o Camiño”, mesturándoo co lema deste curso
“Xeografías Lectoras” montamos o noso CAMIÑO POÉTICO,empregando distintos recursos (plásticos,
sonoros e literarios) e nel participaron a totalidade das aulas do centro.
Trátase dun corredor que comunica o centro co pavillóne nel creamos este espazo, que se fusiona co
día da árbore e co proxecto Voz Natura: PASIÑO A PASIÑO FACEMOS O CAMIÑO DA
POESÍA.
A
actividade consistiu en recompilar ou inventar poesías relacionadas co Camiño,
plasmalas nunha pedra de cartón pluma, decoralas, recitalas e gravalas. Todo
isto acompañado dunha bota de peregrino decorada e chea de flores simbolizando
a nosa peregrinaxe. Deste xeito, e tendo en conta a situación de pandemia que estamos a vivir, buscamos
que todo o alumnado poida gozar da totalidade das poesías das diferentes aulas,
dándolle vida ao noso novo espazolector.
Durante o presente curso estamos a
traballar o proxecto interdisciplinar :“PASIÑO A PASIÑO FACEMOS O CAMIÑO”,
fomentando así o noso patrimonio cultural. Como un dos nosos principais
obxectivos é implicar a toda a comunidade educativa e este curso se veu
condicionado pola pandemia, gustaríanos organizar unha actividade virtual na
que poidan participar as familias para fomentar o hábito lector entre o noso
alumnado.
Dado que no mes de abril se celebra o mes do libro, invitámosvos a
gravarvos contando un conto e/ou algunha historia relacionada co CAMIÑO. Poderá
ser contado, lido, con monicreques, teatriño,... e poderán participar os
conviventes que o desexen.
Posteriormente colgarémolo no blog da biblioteca do
centro. Todas as familias que queiran participar poderán enviar o vídeo en
formato mp4 ao correo do blog: agromuinobiblio@gmail.com. indicando en dito correo o nome e curso do neno
así como o título do conto.
Poderanse enviar desde o día 22 de marzo ata o 16
de abril.
O calendario escolar
para o curso 2020/2021 contempla a celebración dunha "Semana da
Prensa" na semana do 8 ao 12 de marzo. Velaquí algúns traballos realizados nas nosas aulas:
O Día Internacional da Muller 2021 reivindica os dereitos das mulleres baixo o lema: “Mulleres líderes: Por un futuro igualitario no mundo da Covid-19”, celebra os enormes esforzos realizados por mulleres e nenas de todo o mundo á hora de definir un futuro máis igualitario e a recuperación ante a pandemia de Covid-19, e resalta as deficiencias que persisten. A campaña da ONU pretende mobilizar a todas as persoas, incidindo en que coa participación e o liderado plenos e efectivos das mulleres en todos os ámbitos da vida conséguese o progreso para todo o mundo.
A Axenda 2030 marca como obxectivo número 5: Lograr a igualdade entre os xéneros e empoderar a todas as mulleres e nenas. As bibliotecas deben apoiar a igualdade de xéneros e ofrecer lugares, e actividades, de encontro e empoderamento.
Nesta ocasión, o alumnado de 4º e 6º de Primaria realizaron uns carteis para fomentar a igualdade, a través dunha acción que visualice a contribución das mulleres nos distintos ámbitos e promova a reflexión sobre os estereotipos de xénero que aínda existen na sociedade.
Tamén, as alumnas e os alumnos do CEIP Agro do Muíño celebran este ano o “Día da Muller” coa gravación dun vídeo no que interpretan a canción de Rozalén “A Porta Violeta”, un canto a prol da igualdade e dos dereitos das mulleres, que pode ser escoitado en Ames Radio.
E dende o comedor... O alumnado usuario do comedor realizou esta actividade cos monitores/as. Precioso traballo!!!
Co gallo do mes de Rosalía, o Servizo de Normalización Lingüística, en colaboración cos equipos de Dinamización da Lingua Galega dos centros educativos de infantil e primaria do concello, pon en marcha “A luz de Rosalía”, unha intervención poética urbana que inzará de versos rosalianos os farois das rúas máis transitadas do municipio. Profesorado e alumnado traballa esta primeira quincena de febreiro na escolla dos versos, mentres que a Concellaría de Normalización Lingüística comezou xa a repartir polos centros educativos os soportes nos que, ademais das palabras de Rosalía elixidas por cada centro, sinalarase a aula que realizou o traballo e o colexio ao que pertence. Desde o 22 de febreiro até o 7 de marzo, toda a veciñanza poderá gozar desta exposición urbana coa que se conmemora o aniversario da poeta.
Participan no proxecto o CEIP Agro do Muíño, os CEIP de A Maía, Barouta e Ventín, a Escola Infantil do Milladoiro e as escolas unitarias de Covas e da Tarroeira.
O 24 de febreiro está recollido no Calendario do Libro e a Lectura, publicado pola Consellería de Cultura, Educación e Universidad, como o aniversario do nacemento de Rosalía de Castro. Cada ano son máis as institucións que se suman á celebración do DÍA DE ROSALÍA, entre elas as bibliotecas escolares promovendo actividades que achegan ao alumnado a súa vida e obra. Traballos de investigación, lecturas compartidas, roteiros, actividades plásticas e creativas, programas de radio, proxectos multimedia... son algunhas das propostas que nestes días salientan a modernidade e actualidade do seu pensamento.
A Asociación de Escritoras e Escritores en Lingua Galega convida neste 2021, baixo o lema Teus doces cantares, a celebrar este día co agasallo dun libro en galego e unha flor ás amizades e persoas queridas. Publica un manifesto na voz de Anna R. Figueiredo e propón múltiples actividades ás que se poden sumar os centros educativos. Unha proposta para traballar o compromiso da nosa poeta a través dos seus doces cantares.
Temos unhas actividade para compartir este día convosco:
Vídeo colaborativo adicado ao día internacional da Muller e a Nena na Ciencia. Mulleres e nenas de Ames colaboraron para difundir o papel da muller na ciencia.
