SAMAÍN NO AGRO 2026: UNHA FESTA DE MAXIA E LENDAS!

 Este ano, o Samaín chega ao Agro do Muíño cargado de maxia, misterio e seres fantásticos! 

Da man do noso PDI «O Muíño encantado: seres mitolóxicos e lendas», mergullarémonos nun mundo de meigas, trasnos, mouras, lobishomes e outras criaturas que forman parte do noso imaxinario.

As cabazas volverán ser protagonistas dunha exposición moi especial, na que a creatividade e a imaxinación das familias encherán o noso cole de maxia.

E para completar esta celebración, o venres 30 de outubro, de 18:00 a 20:00 h, abriremos as portas do centro para gozar dunha tarde con música e animación da man da DJ Animus, un photocall preparado pola ANPA e moita diversión para toda a familia.

Agardámosvos para vivir un Samaín terrorificamente máxico!

Queredes coñecer todos os detalles da celebración?

Premede aquí para consultar a carta informativa ás familias sobre o Samaín 2026.

AGROBIBLIO, UNHA BIBLIOTECA ENCANTADA!

 A maxia chegou a Agrobiblio! 

A nosa biblioteca transformouse nun lugar encantado, onde as lendas, os seres fantásticos e a imaxinación cobran vida.

Abride ben os ollos e deixádevos sorprender... A aventura máxica acaba de comezar!

O Muíño encantado: seres mitolóxicos e lendas

 O Muíño encantado: onde as lendas cobran vida!

Un novo curso comeza no CEIP Agro do Muíño e, con el, unha aventura chea de maxia, misterio, imaxinación e descubrimentos.

Despois de percorrer o universo cos nosos Agronautas, este ano regresamos á Terra para descubrir un mundo igualmente fascinante: o dos seres mitolóxicos, os mitos e as lendas.

Algo extraordinario está a acontecer en Agrobiblio... Entre os libros e os recunchos da nosa biblioteca comezan a espertar trasnos rebuldeiros, mouras misteriosas, meigas, fadas, dragóns e outros seres fantásticos que nos convidan a descubrir os segredos agochados nas lendas.

Este curso, o noso alumnado converterase en exploradores e exploradoras de historias, lendas e tradicións, dispostos a investigar, facer preguntas, ler, imaxinar, crear e compartir novos descubrimentos.

Co noso Proxecto Documental Integrado «O Muíño encantado: seres mitolóxicos e lendas», iniciaremos unha viaxe pola riqueza da mitoloxía e das tradicións galegas, abrindo tamén as portas aos mitos, lendas e seres fantásticos doutras culturas do mundo.

Ao longo desta aventura, Leo e Lea acompañarannos para descubrir que detrás de cada lenda se agochan historias sorprendentes, costumes, crenzas e saberes que forman parte da nosa memoria colectiva.

A biblioteca volverá ser un espazo de encontro, lectura, investigación e creatividade, onde compartiremos experiencias, daremos vida ás historias e seguiremos construíndo novas aprendizaxes entre todas e todos.

Porque as lendas son moito máis ca historias fantásticas: son unha porta aberta á nosa cultura, á memoria dos pobos e ao poder da imaxinación.

Preparade os vosos libros, espertade a curiosidade e deixádevos levar pola maxia...

O MUÍÑO ENCANTADO ABRE AS SÚAS PORTAS!

QUE COMECE A MAXIA! 

MISIÓN VERÁN: LER, IMAXINAR E DESCUBRIR

 Coa chegada das vacacións, deixámosvos unha última proposta para seguir viaxando a través dos libros.

As bibliotecas escolares dos centros públicos de Ames elaboramos conxuntamente esta Guía de Verán 2026, unha selección de lecturas para diferentes idades e intereses pensada para acompañar ao alumnado durante os meses de descanso.

Historias de aventura, humor, misterio, fantasía, emoción, ciencia e moitas sorpresas agárdanvos entre as súas páxinas.

Agardamos que esta guía vos axude a descubrir novas lecturas e a seguir alimentando a curiosidade e a imaxinación durante o verán.

Porque cada libro pode ser o comezo dunha nova aventura.

Feliz verán e felices lecturas!

PREME NA IMAXE

AGRONAUTAS: MISIÓN CUMPRIDA

Chegamos ao final dunha emocionante viaxe que nos acompañou ao longo de todo este curso. A través do noso PDI Agronautas en órbita, o alumnado converteuse en explorador do coñecemento, descubrindo os segredos do universo e aprendendo a mirar máis alá do horizonte.

Durante estes meses, a Agrobiblio transformouse nun punto de encontro para a lectura, a investigación, a creatividade e a colaboración. Libros, experimentos, proxectos, podcasts, exposicións, obradoiros, encontros e moitas outras experiencias permitíronnos aprender xuntos e construír novas aventuras arredor do coñecemento.

Cada actividade, cada lectura compartida e cada reto superado formaron parte desta gran misión colectiva na que alumnado, profesorado e familias contribuíron a facer medrar a nosa comunidade educativa.

Agora é momento de descansar, gozar do verán e recargar enerxía para novos desafíos. Pero antes de apagar os motores da nosa nave, queremos dar as grazas a todas as persoas que fixeron posible esta viaxe.

A misión Agronautas chega ao seu destino, mais a curiosidade, a ilusión por aprender e o amor polos libros seguirán acompañándonos alá onde vaiamos.

E quen sabe... Quizais en setembro nos agarde unha nova aventura chea de historias, misterios e maxia por descubrir.

Bo verán e felices lecturas!

O equipo da Agrobiblio.

PECHAMOS O CURSO NA CARBALLEIRA DE ORTOÑO

 Hoxe, 19 de xuño, puxemos o broche final ao curso 2025-2026 cunha gran festa na Carballeira de Ortoño.

O alumnado e o profesorado desprazámonos ata este fermoso espazo para gozar dunha xornada de convivencia, música tradicional, merenda campestre e, por suposto, dun refrescante xeado para celebrar a chegada do verán.

Foi unha mañá chea de alegría, risas e bos momentos compartidos que serviu para despedir un curso intenso e inesquecible.

Vémonos en setembro. O verán comeza... pero algo nos di que o próximo curso traerá historias realmente encantadoras.

Feliz verán!

PREME NA IMAXE

O PRINCIPIÑO CHEGA AO PALACIO DE CRISTAL

 Tras a emocionante representación na Casa da Cultura de Bertamiráns, o alumnado de 6º volveu subir ao escenario para compartir O Principiño co resto da comunidade educativa do CEIP Agro do Muíño.

O Palacio de Cristal encheuse de maxia, música, danza, expresión dramática e acrosport nunha actuación moi especial na que os nenos e nenas de Infantil e Primaria, xunto co profesorado, puideron gozar desta fermosa adaptación inspirada no noso PDI Agronautas en órbita.

Foi unha oportunidade para compartir co resto do centro o resultado de meses de traballo, esforzo, ilusión e aprendizaxe, demostrando unha vez máis o talento, a creatividade e o compromiso do noso alumnado de 6º.

Grazas por facernos soñar, emocionarnos e lembrar que o esencial é invisible aos ollos.

A voar, rapazada!

Fin dunha etapa. Comezo de mil aventuras.

PREME NA IMAXE

DESPEDIDA DOS NOSOS BIBLIOAXUDANTES, ANIMADORES/AS Á LECTURA E TÉCNICOS DE SON

MISIÓN CUMPRIDA, TRIPULACIÓN AGROBIBLIO 

Hoxe despedimos a unha parte moi especial da nosa tripulación: os nosos biblioaxudantes, animadores/as á lectura e técnicos de son de 6º.

Ao longo deste curso, a nosa biblioteca contou cun equipo extraordinario de alumnado que dedicou parte do seu tempo, da súa ilusión e do seu compromiso a facer de Agrobiblio un lugar mellor para todos e todas.

Os biblioaxudantes colaboraron na organización dos fondos, no préstamo, na orde dos espazos, no funcionamento da biblioteca, no torneo de xadrez e en moitas outras tarefas imprescindibles para o día a día.

Pola súa banda, os animadores e animadoras á lectura converteron os libros en aventuras compartidas, levando contos, representacións e actividades lectoras aos máis pequenos e pequenas do centro, contaxiando o seu entusiasmo pola lectura.

Tamén queremos agradecer o labor dos nosos técnicos de son, que fixeron posible o funcionamento de Radio AgroOnda e colaboraron con responsabilidade e profesionalidade nas diferentes actividades realizadas ao longo do curso.

Hoxe pechades unha etapa no CEIP Agro do Muíño deixando unha pegada inesquecible en Agrobiblio. Grazas polo voso esforzo, responsabilidade, creatividade, compromiso e xenerosidade. Sen vós, moitas das actividades que fan da nosa biblioteca un espazo vivo, participativo e cheo de historias non serían posibles.

Levades convosco moitas experiencias, aprendizaxes e recordos, pero tamén deixades aquí unha parte de vós que seguirá formando parte da historia de Agrobiblio.

Foi un orgullo contar convosco nesta misión.

Moita sorte na nova aventura que está a piques de comezar. Agrobiblio sempre será a vosa casa.

Grazas por facer medrar Agrobiblio cada día.

Ata sempre, agronautas.

PREME NA IMAXE

O PRINCIPIÑO: UNHA DESPEDIDA INESQUECIBLE

 A Casa da Cultura de Bertamiráns converteuse no escenario dunha tarde chea de emocións coa representación de O Principiño por parte do alumnado de 6º de Primaria.

Inspirada no noso PDI Agronautas en órbita, esta adaptación permitiulles compartir coas súas familias o resultado de meses de traballo, ensaios, aprendizaxes e ilusión. Música, danza, expresión dramática e acrosport uníronse para dar vida a unha historia que fala da amizade, dos soños e da importancia de mirar máis alá do visible.

Esta actuación serviu tamén como unha fermosa despedida da súa etapa no CEIP Agro do Muíño, pechando un capítulo cheo de experiencias, recordos e momentos compartidos.

Moitísimas grazas a Alicia polo seu traballo, dedicación e compromiso ao longo destes cursos, facendo posible unha despedida tan especial para o noso alumnado.

Moita sorte nesta nova etapa que está a piques de comezar.

A voar, rapazada!

Fin dunha etapa. Comezo de mil aventuras. 

PREME NA IMAXE

PODCAST: PATIOS INCLUSIVOS E DINÁMICOS EN AGRO DO MUÍÑO

 Este curso, no noso centro, comezamos novas propostas para facer que o noso patio sexa máis inclusivo e dinámico: disco patio, taller de pulseiras, ... 

E que opinan os nenos e nenas deses cambios?

PODCAST CON HISTORIA: DMITRI MENDELÉIEV

O alumnado de 6ºB, dentro da área de Ciencias Sociais, estivo investigando sobre o pasado e viaxou no tempo para entrevistar a grandes personaxes do s.XX. 
Desta forma, podemos achegarnos ao pasado dunha forma diferente, sendo eles mesmos os protagonistas.
Acompañádelos?

O SOÑO DE VIOLETA CHEGA AO NOSO CENTRO

 No marco das actividades promovidas por Agrobiblio, hoxe tivemos a sorte de recibir á Aula Colectiva de Violas do Conservatorio Profesional de Música de Santiago de Compostela, que nos ofreceu o conto musicado O soño de Violeta.

A proposta espertou tanto interese que a nosa Agrobiblio quedou pequena para acoller a todo o público asistente, polo que tivemos que trasladarnos a un espazo máis amplo para que o alumnado de 4 anos, 1º, 2º e 6º de Primaria puidese gozar desta fermosa experiencia.

Ao longo da sesión, a narración e a música combináronse para dar vida á historia de Violeta. As interpretacións en directo das violas e do piano acompañaron cada momento do conto, facendo que o alumnado se mergullase nunha viaxe chea de emocións, imaxinación e sensibilidade artística.

A actividade tivo ademais un significado moi especial para a nosa comunidade educativa, xa que entre as integrantes da Aula Colectiva de Violas atopábase a nosa alumna Lucía Faus, que puido compartir cos seus compañeiros e compañeiras a súa paixón pola música e formar parte desta fermosa experiencia.

Queremos agradecer ao profesorado e ao alumnado do Conservatorio Profesional de Música de Santiago de Compostela a súa visita e a oportunidade de achegarnos unha proposta artística tan coidada e inspiradora.

Unha mañá na que a música e a literatura volveron darse a man, demostrando unha vez máis que Agrobiblio é tamén un espazo para crear, sentir e soñar.

PREME NA IMAXE