UNS PLANETAS PEQUENOS NA INMENSIDADE DO SISTEMA SOLAR- JORGE MIRA

 A rapazada de 5º e 6º tivo a sorte de participar nunha charla moi especial da man de Jorge Mira, físico, investigador e divulgador científico de recoñecido prestixio.

Baixo o título "Uns planetas pequenos na inmensidade do sistema solar", o alumnado puido descubrir dun xeito ameno e moi visual as dimensións dos planetas e as enormes distancias que os separan, comprendendo mellor a verdadeira escala do noso Sistema Solar.

Foi unha experiencia enriquecedora que espertou a curiosidade e o interese pola ciencia, permitindo achegar conceptos complexos dunha forma próxima, clara e accesible.

É unha honra contar no noso centro coa visita de persoas tan destacadas no ámbito científico e divulgativo, que atopan un oco para compartir o seu tempo e os seus coñecementos cos nosos nenos e nenas.

Moitísimas grazas a Jorge Mira por esta magnífica experiencia e tamén a Ana e Olalla pola súa colaboración e polas xestións realizadas para facela posible.

PREME NA IMAXE 

TRABALLOS DE NOSO PDI: "AGRONAUTAS EN ÓRBITA"

 Misión 25/26 en marcha

No marco do noso PDI Agronautas en órbita, o alumnado do CEIP Agro do Muíño embarcouse nunha apaixonante viaxe de descubrimento, aprendizaxe e creación.

Ao longo do curso, nenos e nenas de Educación Infantil e Primaria investigaron, experimentaron, imaxinaron e compartiron coñecementos a través de proxectos, retos, investigacións e propostas creativas relacionadas co universo e coa exploración do noso mundo.

Neste espazo recompilamos unha mostra dos traballos realizados ao longo desta aventura. Cada creación reflicte o esforzo, a curiosidade, a ilusión e o traballo en equipo que acompañaron esta gran misión.

Preparados para despegar con nós?

PREME NA IMAXE

UNHA VIAXE Á IDADE MEDIA DENDE AGROBIBLIO

 A Agrobiblio converteuse por un día nun auténtico escenario medieval grazas ao traballo do alumnado de 5º C.

Despois de investigar e aprender sobre a Idade Media, os nenos e nenas prepararon unha representación na que compartiron co resto do alumnado todo o que descubriron sobre esta etapa histórica. A través de escenas, explicacións e recreacións, achegáronnos aos castelos, aos cabaleiros, á vestimenta e aos costumes da época.

Para ambientar a actividade, elaboraron un gran castelo de cartón e empregaron disfraces e recursos da Biblioteca Creativa, transformando a biblioteca nun espazo onde a historia cobrou vida.

Os seus compañeiros e compañeiras de 5º e o alumnado de 2º de Primaria, cos que comparten os apadriñamentos lectores, puideron gozar desta particular viaxe no tempo.

Unha experiencia na que a investigación, a creatividade, a expresión oral e o traballo en equipo demostraron que aprender tamén pode ser crear, compartir e representar.

PREME NA IMAXE

UN CURSO DE LECTURAS COMPARTIDAS

APADRIÑEMENTOS LECTORES DO MES DE MAIO 

Co encontro deste mes de maio, rematamos os apadriñamentos lectores deste curso, unha actividade que nos permitiu compartir lecturas, experiencias e momentos moi especiais entre alumnado de diferentes idades.

Ao longo destes meses, padriños e madriñas acompañaron aos seus afillados e afilladas nunha viaxe chea de contos, aventuras, aprendizaxes e emocións. Cada encontro converteuse nunha oportunidade para descubrir novas historias, fortalecer o gusto pola lectura e crear vínculos que van moito máis alá dos libros.

Os apadriñamentos lectores demostraron, unha vez máis, que a lectura é unha poderosa ferramenta para aprender, convivir e compartir. Grazas a todos os nenos e nenas participantes por facer posible esta fermosa experiencia que xa forma parte da vida de Agrobiblio.

Porque as mellores historias non só se len... tamén se comparten.

PREME NA IMAXE

Unha clase, mil historias en viñetas

 Dentro das actividades desenvolvidas no marco do noso PLEA, o alumnado de 5º C converteuse en autor e ilustrador das súas propias historias a través da banda deseñada.

A partir da lectura, da imaxinación e da creatividade, os nenos e nenas deron vida a personaxes sorprendentes e a relatos cheos de aventuras, misterio, amizade, humor, fantasía, investigación e emoción. Cada cómic é unha mostra do seu talento para contar historias, combinando texto e ilustración para expresar ideas e dar forma a mundos únicos.

Esta actividade permitiulles desenvolver a súa competencia lectora, escritora e artística, explorando novas formas de comunicar, crear e compartir as súas ideas.

O resultado é unha colección de cómics variada e orixinal que demostra que, cando a lectura inspira e a creatividade entra en xogo, unha clase pode crear mil historias diferentes.

PREME NA IMAXE

FALADOIRO UN MUNDO MÁXICO 4 ANOS B

 O alumnado de 4 anos B de Infantil gozou dun faladoiro moi especial da man de Elena, nai de Faia, que nos trouxo contos, imaxinación e algunhas sorpresas.

A través das historias “El duende astronauta y su viaje a las estrellas” e “La pequeña bellota”, viaxamos polo espazo, descubrimos planetas e coñecemos a aventura dunha pequena landra que chegou a converterse nun gran carballo.

Ademais, Elena ensinounos que diante do noso colexio temos un carballo moi especial, ao que agora miraremos con outros ollos.

Para rematar, compartimos unhas deliciosas galletas que puxeron o broche final a unha actividade chea de fantasía e aprendizaxes.

Moitas grazas, Elena, por compartir connosco este faladoiro tan especial.

PREME NA IMAXE

FALADOIRO PUZLES LOCOS 5 ANOS A

 Hoxe tivemos un faladoiro moi especial da man de Vanessa e Xabi, que participan en campionatos de puzles e viñeron compartir connosco a súa experiencia.

Durante a actividade explicáronnos a importancia de facer puzles e os beneficios que achegan ao noso cerebro, xa que axudan a mellorar a concentración, a memoria e o razoamento. Tamén descubrimos curiosidades sobre os campionatos nos que participan e o traballo en equipo que requiren.

Foi unha experiencia moi interesante que nos animou a seguir aprendendo e divertíndonos a través dos puzles.

Moitas grazas a Vanessa e Xabi pola súa colaboración e por compartir connosco este faladoiro tan entretido e enriquecedor!

PREME NA IMAXE

AS LETRAS GALEGAS SOARON NO MUÍÑO

 No CEIP Agro do Muíño vivimos unha xornada moi especial para celebrar o Día das Letras Galegas 2026, dedicada este ano a Begoña Caamaño.

O acto comezou cunha pequena presentación preparada polo alumnado de 5º A, que nos achegou á vida e á obra da escritora, xornalista e activista homenaxeada neste 2026.

Ao longo da gala tamén puidemos desfrutar das actuacións musicais do profesorado, dunha mostra de traballos realizados nas aulas arredor da autora e dun espectacular concerto de Tentáculo Rock, que puxo ritmo e emoción a esta celebración da nosa lingua e da nosa cultura.

Como broche final, todo o centro uniuse para cantar o Himno Galego, acompañado polo son das pandeiretas do alumnado, da gaita interpretada por alumnado, profesorado e mesmo polo noso conserxe, creando un momento moi especial e emocionante para toda a comunidade educativa.

Unha celebración chea de música, palabras, emoción e orgullo pola nosa lingua.

PREME NA IMAXE

TRABALLOS DO ITINERARIO LECTOR 25/26

Este curso, o noso itinerario lector acompaña o PDI “Agronautas en órbita”, unha proposta que nos invita a explorar, descubrir e imaxinar.

As lecturas seleccionadas achégannos a mundos e experiencias diversas: algunhas conectan directamente coa temática do proxecto, mentres outras amplían horizontes e enriquecen a nosa viaxe lectora desde diferentes perspectivas.

Este itinerario intégrase tamén no marco do PLEA, reforzando o papel da lectura como ferramenta fundamental para aprender, reflexionar e medrar.

Porque ler é, ao fin e ao cabo, unha forma de viaxar.

PAKOLAS ACTIVA O “MODO GALEGO” NO NOSO CENTRO

Hoxe tivemos a sorte de desfrutar no centro dun concerto de Pakolas dirixido a todo o alumnado, baseado no libro-disco A Ramona pequena vai á Lúa.

Esta actividade enmárcase dentro do programa “Modo galego, actívao” e foi financiada polo Servizo de Normalización Lingüística do Concello de Ames, achegando ao noso alumnado unha proposta chea de música, humor, participación e lingua galega.

Ao longo do concerto fomos cantando, bailando e descubrindo as cancións e personaxes desta divertida aventura espacial, nun espectáculo no que a música e a literatura volveron ir da man para facernos gozar e aprender dunha maneira moi especial.

Aquí vos deixamos unha mostra do ben que o pasamos!

PREME NA IMAXE

TENTÁCULO ROCK ESTÁ A PIQUES DE SOAR…

 O que ía ser un pequeno concerto íntimo en Agrobiblio… acabou converténdose nun evento para todo o cole.

O vindeiro 21 de maio, o Palacio de Cristal encherase de ritmo, guitarras e moito rock da man de Tentáculo Rock, un grupo formado por catro alumnos de 6º de Primaria do noso centro.

Despois do seu recente éxito en Quero Cantar, tiñamos moi claro que todo o alumnado merecía disfrutar desta experiencia.

De momento… gardamos algunhas sorpresas.

Pero hai algo que si podemos adiantar:

vai ser unha mañá inesquecible.

VIVA O ROCK AND ROLL! 

AGRONAUTAS EN ÓRBITA NA CASA DAS CIENCIAS

 O alumnado de 4 anos realizou hoxe unha fantástica visita á Casa das Ciencias, onde puideron experimentar, observar e descubrir o mundo da física e da astronomía dun xeito divertido e interactivo.

Durante a xornada descubriron o impresionante péndulo de Foucault, xogaron cos módulos interactivos relacionados coa física e visitaron a exposición “Puro swing”, experimentando co movemento dos péndulos, a gravidade e diferentes fenómenos científicos.

A aventura continuou no planetario, onde viaxaron polo espazo e o tempo grazas ás proxeccións astronómicas que lles permitiron observar estrelas, planetas e constelacións como auténticos agronautas.

Unha experiencia chea de curiosidade, emoción e aprendizaxe dentro do noso PDI deste curso, “Agronautas en órbita”.

PREME NA IMAXE