APADRIÑAMENTOS MES DE ABRIL

 No mes de abril, coincidindo co Día do Libro, volvemos vivir unha fermosa xornada de apadriñamentos lectores no noso centro.

Padriños e madriñas, xunto cos seus afillados e afilladas, compartiron lecturas, historias e momentos moi especiais en distintos espazos do cole. A través dos libros, seguen medrando non só como lectores e lectoras, senón tamén como compañeiros e compañeiras.

Unha vez máis, comprobamos que ler en compañía fai que as historias cobren vida e que a lectura se converta nunha experiencia inesquecible.

PREME NA IMAXE

FALADOIROS AULA LARANXA 2025-2026 4 ANOS A

 Grazas pola vosa colaboración.

PREME NA IMAXE

A MAXIA DO DIÁBOLO NA AGROBIBLIO

 Nos últimos días, a Agrobiblio converteuse nun espazo cheo de movemento e habilidade grazas a Hugo, que nos foi amosando diferentes trucos co diábolo durante os recreos.

Pouco a pouco, fomos descubrindo como este xogo require coordinación, práctica e moita constancia. O alumnado achegouse con curiosidade para observar, aprender e gozar destes pequenos momentos que enchen a biblioteca de vida.

A través destes exercicios e demostracións, a biblioteca segue a ser un lugar aberto onde compartir talentos, descubrir novas afeccións e aprender uns dos outros.

Moitas grazas, Hugo, pola túa colaboración e por achegar á Agrobiblio unha experiencia tan especial!

PREME NA IMAXE

¡ALGUIEN SE HA TRAGADO A LOLA! EN 5 ANOS

 As animadoras á lectura de 6º de Primaria visitaron ao alumnado de 5 anos para contar o conto ¡Alguien se ha tragado a Lola!. Acompañadas dos seus monicreques, elaborados por elas mesmas, deron vida á historia dunha maneira divertida e moi expresiva.

Os máis pequenos seguiron o conto con moita atención e entusiasmo, sorprendéndose coas aventuras da protagonista e gozando de cada momento. As personaxes foron cobrando vida, facendo da sesión unha experiencia moi especial.

Ademais, o alumnado de 5 anos realizou unha ficha relacionada co conto, na que puideron expresar a súa creatividade a través de debuxos inspirados na historia.

Un novo encontro cheo de lectura, creatividade e ilusión compartida.

Grazas ás animadoras polo seu traballo, dedicación e entusiasmo.

PREME NA IMAXE

ENTRA NA NAVE DE RAMONA

🚀 MISIÓN: NAVE RAMONA ACTIVADA

Recibimos unha sinal misteriosa desde o espazo...

A tripulación precisa da túa axuda para activar o panel musical da nave.

🎧 Cada botón agocha unha canción do concerto baseado no libro A Ramona pequena vai á Lúa.

👉 PREME NA IMAXE PARA ENTRAR NA NAVE 🚀

A VACA QUE PUXO UN OVO NO ESPAZO DE FORO 1º B

 Os Animadores á lectura de 6º de Primaria ofreceron unha nova sesión no espazo de foro para o alumnado de 1º B, onde contaron o conto A vaca que puxo un ovo. Nesta ocasión, ao estar o teatriño ocupado por outro grupo de animadores á lectura, tiveron que buscar unha alternativa e non se lles ocorreu mellor idea que colocarse detrás das gradas para dar vida á historia.

A pesar deste cambio, souberon apañarse moi ben cos recursos que tiñan á man, demostrando creatividade, iniciativa e ganas de levar a lectura aos máis pequenos. Co apoio dos seus monicreques e da súa interpretación, conseguiron captar a atención do alumnado, que seguiu o conto con interese e entusiasmo.

Unha sesión diferente na que, unha vez máis, o importante foi compartir a lectura.

Grazas aos animadores de 6º polo seu esforzo, traballo e capacidade de adaptación.

PREME NA IMAXE

FALADOIRO: ENTRE MOREIRAS E SILVEIRAS 2º A

 Hoxe vivimos unha xornada diferente e moi enriquecedora na nosa aula. Tivemos o pracer de recibir a visita dos pais de Mara, que compartiron connosco os seus coñecementos sobre dous invertebrados fascinantes: o insecto pau e o verme de seda.

​O fascinante mundo do insecto pau

​Malia o seu aspecto fraxil e o seu asombroso mimetismo, estes animais agochan segredos biolóxicos incribles. Aprendemos que:

​Reprodución por partenoxénese: Unha das maiores sorpresas foi descubrir que as femias non precisan dun macho para procrear. Poden poñer ata 50 ovos que eclosionan tras un período de entre 2 e 4 meses.

​Dieta e hábitat: Aliméntanse de follas frescas de silveira, roseira e hedra. Para o seu mantemento en catividade, precisan un terrario provisto de terra e pólas, sendo vital a pulverización periódica de auga para garantir os niveis de humidade necesarios para a súa supervivencia.

​Revisando o ciclo do verme de seda

​Como xa traballaramos con eles o curso pasado, aproveitamos a visita para repasar o seu ciclo vital e a súa importancia:

​Especialización: A súa dieta é exclusivamente folla de moreira.

​A metamorfose: Tras unha fase de crecemento intensivo, o verme comeza a fiar o seu propio casulo de seda. No seu interior, realízase a transformación ata que xorde a bolboreta, cuxa misión principal será a posta de ovos para reiniciar este ciclo vital tan asombroso.

​Queremos agradecerlles de corazón aos pais de Mara que achegasen a natureza á nosa aula, permitíndonos aprender de xeito directo e práctico sobre a biodiversidade e o coidado dos seres vivos.

GRAZAS POLA VOSA COLABORACIÓN!

PREME NA IMAXE

DOBRE SESIÓN DE CONTOS EN 4 ANOS

 Nesta ocasión, o grupo de animadoras á lectura de 6º de Primaria visitou ao alumnado de 4 anos para compartir non un, senón dous contos: ¡Alguien se ha tragado a Lola! e A toupiña que quería saber quen lle fixera aquilo na cabeza.

A través da súa interpretación e dos monicreques elaborados por elas mesmas, deron vida ás historias, conseguindo captar a atención dos máis pequenos, que seguiron os contos con entusiasmo e moitas ganas de participar.

Unha sesión chea de lectura, risas e ilusión compartida, na que as animadoras volveron demostrar o seu gran traballo e dedicación.

Grazas ás animadoras polo seu esforzo, creatividade e entusiasmo.

PREME NA IMAXE

FALADOIRO: ENTRE A CIENCIA E A COCIÑA 3º C

 Os pais de Pablo M. e de Antón animaron a mañá deste luns cun faladoiro cheo de experimentos e sabor. O alumnado gozou descubrindo diferentes propostas con auga, lume e fluído non newtoniano, que espertaron a curiosidade e sorprenderon a todos e todas.

Despois chegou o momento máis doce da xornada: a elaboración de filloas. Os nenos e nenas de 3º C convertéronse en auténticos filloeiros e filloeiras, preparando cada un a súa propia filloa.

Unha experiencia moi divertida e enriquecedora na que ciencia e tradición se uniron para facernos aprender gozando.

Moitas grazas ás familias pola súa implicación e por compartir connosco este fantástico faladoiro!

PREME NA IMAXE

AUDIOCONTO: CLEMENTINA Y LOS PLANETAS

O alumnado de 1ºC convídavos a despegar cara o descoñecido a través da intrépida Clementina neste audioconto no que poñen a voz ao libro "Clementina y los planetas", escollido dentro do itinerario lector deste curso, relacionado co proxecto de centro "Agronautas en órbita".

Preparade os vosos cascos, axustade os cintos e ...3, 2, 1....Despeguen!

VISITA DE ÁNGEL CARRACEDO

 DO LABORATORIO Á AULA: INSPIRACIÓN CIENTÍFICA NO COLE

Hoxe poidemos desfrutar da sabedoría de Ángel Carracedo, catedrático de Medicina Legal, investigador e experto internacional en xenética.

Mantivo ó alumnado de 5° e 6° expectantes cos seus experimentos de ADN e resolucións de casos criminalísticos en varios países. Sempre é un pracer compartir momentos con persoeiros tan relevantes e ademais do noso Concello. Grazas a Olalla pola xestión ao facilitarnos este encontro.

PREME NA IMAXE

FALADOIRO: LA ESTRELLA DE TOPO 4 ANOS B

 Hoxe, tivemos a visita de ángeles, a nai de Thiago, da aula de 4 anos B, que contounos o coonto "La estrella de Topo". Pasámolo xenial!

Grazas pola túa colaboración.

PREME NA IMAXE

UN UNIVERSO DE LIBROS

 O equipo de Educación Infantil sorprendeunos con este espectacular mural creado con motivo do Día do Libro, inspirado no noso proxecto Agronautas en órbita.

A través dunha fermosa composición en forma de espiral, na que non faltan o sol e o planeta Terra, o alumnado deu vida a unha creación moi especial empregando portadas e títulos de diferentes contos.

Este mural simboliza a unión entre a lectura e o noso proxecto, amosando como as historias tamén nos permiten viaxar, descubrir e medrar, igual que verdadeiros agronautas.

Un traballo cheo de creatividade, ilusión e amor polos libros que enche de cor e significado o noso centro.

FALADOIRO: EXPERIMENTOS CIENTÍFICOS 1º C

 Hoxe, Olalla e Alberto, nai e pai de Tomás (de 1°C) e Zoe (de 4°B) viñeron á nosa aula para facer un faladoiro no que nos guiaron na elaboración de experimentos científicos, aproveitando que a nai de Tomás é unha prestixiosa investigadora e doutora. Realizamos experimentos tan chulos a simulación dunnha erupción volcánica, unha carreira de foguetes espaciais e unha lámpada de lava. Foi súper divertido!!!

Grazas pola vosa colaboración!

PREME NA IMAXE

A VACA QUE PUXO UN OVO… E TODOS PARTICIPAN

 Os Animadores á lectura de 6º de Primaria visitaron a aula de 2º A para compartir o conto A vaca que puxo un ovo. Acompañados do seu teatriño e dos monicreques elaborados por eles mesmos, deron vida á historia dunha maneira divertida e moi expresiva.

O alumnado seguiu o conto con moita atención, gozando das situacións tan sorprendentes e cheas de humor que presenta a historia. Ademais, tiveron a oportunidade de participar activamente na sesión, colaborando e formando parte da historia.

As personaxes foron cobrando vida, facendo da sesión un momento moi especial de lectura compartida.

Unha nova experiencia na que a lectura, a creatividade e a ilusión volveron ser protagonistas.

Grazas aos animadores de 6º polo seu traballo, dedicación e entusiasmo.

PREME NA IMAXE

FALADOIRO: O FUNCIONAMENTO DO UNIVERSO 1º C

 Hoxe, Diogo, o pai de Dante de 1°C veu facer un faladoiro á nosa aula aproveitando que é profesor universitario e que coñece un montón de cousas acerca do funcionamento do Universo. Falounos da gravidade, de Isaac Newton, do movemento lineal e fixemos varios experimentos para comprender todas estas leis físicas.

Moitas grazas pola túa colaboración.

PREME NA IMAXE

FALADOIRO: CREANDO UN UNIVERSO DE MUNDOS 2º C

 Hoxe tivemos un faladoiro moi creativo da man de Alma, nai de Rosalía, que nos convidou a crear pequenos mundos cheos de imaxinación.

Empregando materiais de refugallo e de uso cotiá, o alumnado puido deseñar e construír os seus propios universos, dando renda solta á súa creatividade.

Unha proposta moi enriquecedora que nos fixo reflexionar sobre a importancia de reutilizar materiais e crear de forma sostible.

Moitas grazas, Alma, por este faladoiro tan inspirador!

PREME NA IMAXE

A VACA QUE PUXO UN OVO EN ACCIÓN

 De novo, os Animadores á lectura visitaron as aulas de 1º A e 1º C para compartir un novo conto no espazo de foros. Nesta ocasión, levaron A vaca que puxo un ovo, que representaron co seu teatriño e os monicreques elaborados por eles mesmos.

O alumnado seguiu a historia con moita atención, sorprendéndose e gozando das divertidas situacións do conto. As personaxes foron cobrando vida grazas á interpretación dos animadores, creando un ambiente cheo de risas e ilusión.

Unha nova sesión de lectura compartida que volveu ser todo un éxito.

Grazas aos animadores de 6º polo seu traballo, ilusión e dedicación.

PREME NA IMAXE

FALADOIRO: SCRATCH 6º B

 Hoxe visitounos Julián, o pai de Breixo de 6°B para facernos un obradoiro de Scratch. E como sabe que este curso estamos a investigar moito sobre o universo propúxonos crear unha simulación de como os planetas xiran ao redor do Sol. Foi moi interesante e aprendemos moitas cousas!

PREME NA IMAXE

FALADOIRO: POEMA "LÚA" E CONTO "O GALO KIRICO" 3 ANOS A

 Hoxe tivemos un faladoiro moi especial na aula coa visita de Pastora, avoa de Martín, que nos agasallou cun fermoso momento cheo de palabra e tradición.

Comezou recitando o poema “Lúa”, achegándonos á poesía dun xeito moi emotivo. Despois, continuou coa narración do conto tradicional “O galo Kirico”, que o alumnado seguiu con moita atención e entusiasmo.

Foi unha experiencia moi enriquecedora, na que puidemos gozar da forza da poesía e dos contos populares transmitidos de xeración en xeración.

Moitas grazas, Pastora, por compartir connosco este tempo tan especial.

PREME NA IMAXE

FALADOIRO: "XOGANDO CO UNIVERSO" 5 ANOS B

 Hoxe,  visitounos Paula, a mamá de Nora, que veu compartir con nós unha actividade moi divertida relacionada co universo: UN BINGO ESPACIAL, no que, en vez de números, tiñamos imaxes e elementos do universo: planetas, estrelas, foguetes, astronautas, extraterrestres,... e ata FORMITAS (a nosa mascota)

Cada vez que xiraba, estabamos en silencio como no bingo de verdade e atentos para ver se tiñamos esa imaxe no noso tarxetón e poder tachala. Que emoción!!!! Todos querían ser os primeiros en completalo,....  

A sorte quixo que fose LIRA  a primeira en cantar bingo, pero serviunos para recordar algo moi importante: o mellor dos xogos non é gañar, senón participar e pasalo ben xuntos. 

Despois, con Nora, xogamos ás adiviñas,  cos planetas do noso sistema solar. A solución tiñaas ela moi ben representadas e decoradas por ela mesma en cartulinas negras moi vistosas.

Grazas pola túa colaboración.

PREME NA IMAXE

LENDO E CREANDO EN 2º A

 Ao longo deste curso, durante a hora de lectura, exploramos diversas dinámicas: dende os libros do itinerario lector e a biblioteca itinerante con exemplares traídos da casa, ata os fondos do noso recuncho do espazo. Ademais, levamos a cabo un obradoiro de escritura creativa, tanto individual como grupal, ao que dedicamos dúas sesións semanais (reservando unha terceira para a lectura compartida). Foi emocionante ver como o que comezaron sendo historias breves se converteron en pequenos libros de varios capítulos. Unha experiencia auténtica!

PREME NA IMAXE

QUEDA SITIO NA VASOIRA? 1º A

 Continuamos cos Animadores á lectura cunha nova sesión na aula de 1º A, onde as alumnas de 6º levaron o conto Queda sitio na vasoira. A través da súa interpretación e dos monicreques, foron dando vida á historia, creando un ambiente cheo de maxia e atención.

O alumnado de 1º A seguiu o conto con moito interese e entusiasmo, desfrutando desta experiencia de lectura compartida.

Un novo encontro no que a lectura volveu ser protagonista.

Moitas parabéns polo voso traballo e dedicación!

PREME NA IMAXE

Lectura Cuando Hitler robó el conejo rosa, de Judith Kerr

 A lectura de Cando Hitler roubou o coello rosa, de Judith Kerr, permitiunos achegarnos a unha realidade histórica complexa desde a mirada dunha nena. A través desta historia, reflexionamos sobre temas como a guerra, o exilio, a perda e a inxustiza, entendendo que a maldade moitas veces nace no corazón humano e que aínda hoxe hai moitos nenos e nenas que sofren situacións difíciles no mundo.

Para traballar estes contidos, realizamos dinámicas de representación teatral nas que os participantes se disfrazaban e recreaban distintas escenas do libro, mentres o resto do grupo trataba de adiviñalas. Esta actividade fomentou a comprensión lectora, a expresión corporal e a empatía cara aos personaxes.

Ademais, levamos a cabo unha actividade moi especial que aparecerá proximamente noutro vídeo: unha práctica de repostaría na que representamos unha das escenas do libro de forma creativa. Foi unha experiencia moi motivadora e divertida para os participantes, que sen dúbida merece un espazo propio.

PREME NA IMAXE

XA TEMOS GAÑADORES!!

Na biblioteca Agrobiblio vivimos unha xornada moi especial coa gran final do torneo infantil de xadrez.

Despois de moitas partidas cheas de concentración, estratexia e emoción, xa coñecemos aos gañadores desta edición, que demostraron un gran nivel e un excelente espírito deportivo ao longo de todo o torneo.

Parabéns aos campións e tamén a todo o alumnado participante, que fixo posible este torneo cun comportamento exemplar e moitas ganas de aprender e xogar.

Seguimos facendo da biblioteca un espazo para pensar, compartir e gozar… tamén a través do xadrez.

PREME NA IMAXE