A biblioteca do CEIP Agro do Muíño, en colaboración co Equipo de Normalización Lingüística, organizou o Concurso de Postais de Nadal, no que o alumnado amosou a súa creatividade e ilusión empregando a lingua galega.
As postais encheron a entrada do cole de cor, mensaxes bonitas e espírito navideño.
Hoxe tivemos un faladoiro moi especial da man de Blas, pai de Xaime, que nos sorprendeu cunha divertida historia protagonizada por uns extraterrestres de Plutón.
Na súa aventura, os plutonianos aterrizaban no Monte San Marcos coa intención de coñecer o municipio de Ames e pasar o verán, xa que no seu planeta fai moito frío. A través deste relato, o alumnado foi descubrindo curiosidades sobre o noso contorno, como as 11 parroquias de Ames ou os ríos máis importantes que o atravesan, o Tambre e o Sar.
Unha proposta moi orixinal que mesturou imaxinación e coñecemento do medio.
Moitas grazas, Blas, por facernos viaxar de Plutón a Ames!
Hoxe tivemos un faladoiro moi interesante da man da madriña de Abril, que nos achegou ao mundo do pergameo.
Explicounos de onde procede o seu nome, como se elaboraban antigamente e cales eran os seus usos, tanto no pasado como na actualidade. Tamén coñecemos os materiais que se empregan para decoralos e puidemos ver algúns exemplos feitos por ela, que nos sorprenderon moito.
Foi unha experiencia moi enriquecedora que nos permitiu descubrir unha técnica tradicional chea de historia.
Nesta sesión traballamos a lectura de A señorita Bubble: Aventuras baixo cero, de Ledicia Costas, unha historia chea de imaxinación, ciencia e conciencia ambiental.
A partir do libro, reflexionamos sobre o problema do desxeo e o impacto do cambio climático no noso planeta. Para facelo dunha maneira práctica e significativa, realizamos un experimento no que analizamos como se produce o desxeo e que accións podemos levar a cabo para contribuír a frear este problema.
Esta actividade permitiu aos participantes non só comprender mellor os contidos do libro, senón tamén tomar conciencia da importancia de coidar o medio ambiente desde as nosas propias accións diarias, fomentando unha actitude responsable e comprometida co entorno.
Hoxe tivemos un faladoiro moi especial titulado “Viaxe lunar”, da man de Teresa, avoa de Pedro.
A través desta proposta, o alumnado realizou unha fascinante viaxe polo espazo para descubrir os segredos do noso satélite, a Lúa. Coñecemos curiosidades, características e detalles que espertaron a nosa curiosidade polo universo.
Unha experiencia moi enriquecedora que nos fixo aprender e soñar coa Lúa.
Moitas grazas, Teresa, por acompañarnos nesta viaxe tan especial!
Hoxe tivemos un faladoiro moi saboroso da man da avoa de Orión, que nos sorprendeu cunha proposta moi especial.
Durante a actividade, convertémonos en cociñeiros e cociñeiras para elaborar unhas deliciosas pizzas seguindo a súa receita, aprendendo paso a paso o proceso de preparación.
Foi unha experiencia moi divertida e enriquecedora, na que combinamos aprendizaxe e creatividade… cun resultado final para chuparse os dedos!
Moitas grazas por compartir connosco este faladoiro tan apetitoso!
A nosa primeira sesión de descubrimento no club de lectura foi unha auténtica experiencia de investigación. A través dunha proposta dinámica e participativa, os nenos e nenas tiveron que ir descubrindo como se ía organizar o club, cal sería o seu funcionamento e tamén adiviñar cal ía ser a primeira lectura.
Foi unha actividade chea de intriga, curiosidade e espírito aventureiro, que espertou o interese e a motivación desde o primeiro momento. Esta sesión inicial permitiu crear un ambiente de entusiasmo e participación, sentando as bases para todo o traballo que desenvolveriamos ao longo do club de lectura.
O alumnado de 6º de E.I fixo un percorrido polo cole para tratar de descubrir si no Agro do Muíño se promovía a inclusión das persoas con Discapacidade para tratar de ver as barreiras e limitacións coas que se enfrentan estas persoas no seu día a día e descubriron que hai cartelería adaptada por todo o centro, ascensor e rampas para eliminar as barreiras arquitectónicas... e comprometéronse a promover un trato respectuoso e natural con estas persoas.
Hoxe en Agrobiblio tivemos un obradoiro moi especial da man de Olivia, alumna de 3ºB, que nos achegou ás primeiras nocións da lingua de signos. Con moita claridade e sensibilidade explicounos como esta linguaxe visual permite comunicar a través dos xestos, da expresión facial e do movemento das mans.
O alumnado puido aprender algúns signos básicos e descubrir que existen moitas maneiras de dicir palabras tan cotiás como “grazas”, “biblioteca”, “boas tardes”, algúns animais e outras moitas máis. Foi unha experiencia chea de respecto e curiosidade, que nos recorda que todas as formas de comunicación son valiosas e necesarias.
Parabéns, Olivia, pola túa sensibilidade e por compartir connosco este fermoso xeito de comunicarnos!
Tras coñecer o braille, tamén puidemos achegarnos ao mundo dos pictogramas, descubrindo que estas imaxes sinxelas serven para facilitar a comunicación, apoiar a comprensión e facer os espazos máis accesibles para todas as persoas.
A través de exemplos e pequenas actividades entendemos como un símbolo pode transmitir unha idea de maneira rápida e clara. Ademais, aproveitamos para colocar os pictogramas da CDU en Agrobiblio, facendo máis visual e comprensible a organización dos libros.
Grazas ós especialistas de PT e AL: Catuxa, Yoli, Guille e María, por axudarnos a facer un espazo máis inclusivo.
Un paso máis para converter a biblioteca nun espazo máis accesible, máis claro e máis inclusivo.
Hoxe en Agrobiblio celebramos o 3 de decembro cun obradoiro no que o alumnado se achegou ao braille, descubrindo como funcionan as celas de seis puntos e escribindo o seu nome mediante o tacto e o xogo.
Foi unha experiencia que abriu conversas sobre empatía, accesibilidade e diversidade funcional, lembrándonos que non todas as persoas lemos do mesmo modo, pero todas temos dereito a acceder ás palabras.
Con motivo do Día Internacional das Persoas con Discapacidade, o alumnado de 3º de Primaria elaborou carteis cheos de creatividade e mensaxes inclusivas. A través de frases como “A amizade non ten barreiras” ou “Xuntos facemos un universo mellor”, encheron os corredores do cole de cor e reflexión.
A actividade forma parte do noso PLEA, utilizando a expresión artística como unha maneira de ler, pensar e comprender a diversidade.
Contamos tamén coa colaboración de COGAMI, que nos cedeu dous paneis expositivos, entre eles o da campaña “Os Bolechas e a Discapacidade”, xunto cunha figura de Spock adaptada cunha prótese que chamou moito a atención do alumnado.
Grazas a todos e todas por facer visible a inclusión cunha mirada tan creativa e verdadeira.
No Muíño seguimos avanzando cara a un cole máis inclusivo e máis humano.
Coincidindo coa conmemoración do Día Internacional das Persoas con Discapacidade, a biblioteca escolar preparou unha exposición especial de libros centrada na diversidade, na inclusión e no respecto ás diferentes formas de ser e estar no mundo.
A selección inclúe álbums ilustrados, contos, biografías, libros informativos e obras de ficción que abordan temas como a diversidade funcional, a superación persoal, a accesibilidade, a empatía ou a convivencia. Son lecturas coidadosamente elixidas para que o alumnado poida achegarse a estas realidades desde unha mirada positiva, sensible e adaptada ás súas idades.
Durante estes días, quen entrou en Agrobiblio atopou nas mesas e estantes títulos que invitan a conversar, a facerse preguntas e a descubrir novas perspectivas. Esta exposición serve como complemento perfecto ao traballo realizado en Infantil e Primaria arredor do 3 de decembro, especialmente aos magníficos carteis creados polo alumnado de 3º.
A iniciativa forma parte tamén do noso PLEA, que entende a lectura como unha ferramenta esencial para educar na igualdade, formar cidadáns máis críticos e fomentar valores como o respecto, a solidariedade e a inclusión.
Animamos a todas as clases a visitar a exposición, levar en préstamo algún destes libros e continuar construíndo, entre todas e todos, unha escola onde as diferenzas suman e enriquecen.
.jpg)
